Fulltrúar Alþjóðagjaldeyrissjóðsins héldu blaðamannafund í Karphúsinu í framhaldi af yfirlýsingu ríkisstjórnarinnar um að óskað verði eftir aðstoð frá sjóðnum. Á ráðherrafundinum var sagt að ekki væri hægt að fara út í þau skilyrði sem sjóðurinn setji fyrir aðstoðinni en á fundinum í Karphúsinu var þó rætt um aðgerðirnar. Sjóðurinn mun ekki krefjast þess að fjárlög skili hagnaði, heldur sé beinlínis reiknað með miklum hallafjárlögum til að byrja með.

Það voru þau Paul Thomsem og Petya Brooks sem kynntu málið fyrir blaðamönnum. Ljóst væri að landið væri að ganga í gegnum áfall sem væri án fordæmis. Ísland muni fara frá því að vera nær skuldlaust yfir í það að vera mjög skuldsett ríki. Hann gerir ráð fyrir um 10 prósent samdrætti í innanlandsframleiðslu.

Thomsen sagði ljóst að peningamálastefna landsins verði aðhaldssöm og í því felst væntanlega að stýrivextir verði áfram háir til þess að koma megi í veg fyrir mikið gjaldeyrisútstreymi.

Hann sagði einnig nokkuð ljóst að mikill halli verði á fjárlögum og að sjóðurinn ætli sér ekki að gera kröfur um hallalaus fjárlög til að byrja með. Hins vegar sagði Thomsen að íslensk stjórnvöld verði að koma sér upp áætlun hvernig hægt verði að draga úr skuldunum fyrir lok ársins 2010.

Aðspurður hvort sjóðurinn hafi sett einhver skilyrði um að Íslendingar gengju til samninga við Breta og aðrar þjóðir sem tapað hafa á íslenskum innlánsreikningunm sagði hann svo ekki vera. Það mál sé á milli Íslendinga og annara ríkja. Hins vegar gerði sjóðurinn ráð fyrir því að úr rætist.

Þá kom einnig fram að fjárþörf íslenska ríkisins næstu tvö árin til þess að takast á við áfallið sé um sex milljarðar dollara. Sjóðurinn leggi til tvo milljarða en reiknað sé með að afgangurinn komi frá öðrum ríkjum.

Thomsen sagðist einnig gera ráð fyrir því að dragi úr verðbólgu og verður hún að hans mati um 4,5 prósent fyrir lok næsta árs.