IMF mun gera ráð fyrir kostnaði vegna Bretadeilu

Steingrímur J. Sigfússon, formaður Vinstri grænna, fullyrðir að Alþjóðagjaldeyrissjóðurinn (IMF) mun í áætlunum sínum fyrir Ísland gera ráð fyrir útgjöldum vegna deilunnar við Breta og Hollendinga.

Ríkisstjórnin hefur formlega óskað eftir samstarfi við IMF um að koma á efnahagslegum stöðugleika á Íslandi. Samstarfið felur í sér lánveitingu frá sjóðnum að jafnvirði 2 milljarða bandaríkjadala og koma 830 milljónir af þeirri fjárhæð til greiðslu við staðfestingu stjórnar sjóðsins.

Steingrímur telur ámælisvert að ríkisstjórnin skuli hafa komið málum í þá stöðu að hún telji enga aðra kosti í boði en að leita á náðir IMF. ,,Ég tel mjög margt varhugavert fyrir okkur og ég er mjög hræddur við þá óbeinu tengingu sem er í deilumálin við Breta og Hollendinga þó reynt sé að gera lítið úr því."

Aðspurður um hvaða óbeinu tengingu hann eigi við segir Steingrímur: ,,Það er ljóst að Alþjóðagjaldeyrissjóðurinn hefur lagt áherslu á að deilumálin verði gerð upp. Það mun líka koma í ljós að sjóðurinn mun gera ráð fyrir útgjöldum vegna þeirra í sínum áætlunum fyrir Ísland."

Steingrímur segir að fundur sem boðaður var með formönnum stjórnarandstöðuflokkanna fyrir hádegi hafi eingöngu verið upplýsingafundur. ,,Þessi ákvörðun er ekki unnin í samráði við okkur." Sömu kynningu fékk utanríkismálanefnd Alþingis og undrast Steingrímur að engum skriflegum gögnum hafi verið dreift á fundinum þar sem nefndin sé bundin trúnaði. ,,Við höfum ekkert annað en munnlegar lýsingar á þessu ferli."