Avram Grant hótað lífláti

Avram Grant var hótað lífláti er pakki sem innihélt dularfullt duft var sendur á æfingasvæði Chelsea.

Grant, sem er knattspyrnustjóri Chelsea, opnaði ekki pakkann heldur starfsmaður félagsins. Æfingasvæðinu var lokað og það innsiglað eftir að pakkinn var opnaður.

Í pakkanum var bréf til Grant þar sem mikið gyðingahatur kom fram en Grant er frá Ísrael. Í bréfinu var sagt að duftið væri banvænt.

„Þegar þú opnar þetta bréf muntu deyja hægum og kvalarfullum dauðdaga," stendur í bréfinu eftir því sem kemur fram á fréttavef BBC.