Del Piero byrjar gegn Rúmenum

Gamli refurinn Alessandro del Piero verður að öllum líkindum í byrjunarliði Ítala á morgun þegar þeir mæta Rúmenum í gríðarlega mikilvægum öðrum leik sínum á EM.

Heimsmeistararnir fengu stóran 3-0 skell gegn Hollendingum í fyrsta leik sínum á mótinu og þurfa því nauðsynlega á sigri að halda gegn Rúmenum á morgun.

Del Piero kom inn sem varamaður gegn Hollendingum og þótti standa sig nokkuð vel og nú er útlit fyrir að hann fái að verða í byrjunarliði Ítala í fyrsta sinn síðan í september. Hann verður þá líka fyrirliði liðsins.

Þá kemur varnarmaðurinn Giorgio Chiellini væntanlega inn í ítalska liðið, en hann gæti komið inn fyrir Marco Materazzi sem á við meiðsli að stríða.

"Chiellini og Del Piero verða væntanlega í liðinu og það má vel vera að við gerum fleiri breytingar," sagði Donadoni landsliðsþjálfari á blaðamannafundi í dag.