Heimamenn héldu lífi

Austurríkismenn eiga enn veika von á EM eftir að heimaþjóðin tryggði sér 1-1 jafntefli gegn Pólverjum í B-riðli í kvöld með marki úr vítaspyrnu í uppbótartíma.

Austurríkismenn voru mun betri aðilinn framan af leik og fengu þrjú dauðafæri á fyrsta korterinu. Þeim var hinsvegar refsað fyrir klaufaskapinn þegar Roger Guerreiro kom Pólska liðnu yfir á 30. mínútu.

Fram að þessu hafði markvörðurinn Artur Boruc verið langbesti maður Pólverja í leiknum og máttu þeir þakka honum að heimamenn gerðu ekki út um leikinn á fyrstu mínútunum.

Fátt benti til þess annars en að Pólverjar færu með sigur af hólmi í kvöld, en þegar komið var fram í uppbótartíma dæmdi enski dómarinn Howard Webb vítaspyrnu á pólska liðið.

Úr henni skoraði gamli refurinn Ivica Vastic og tryggði heimamönnum stig. Hann varð bæði elsti maðurinn til að spila leik og skora á EM - 38 ára að aldri.

Austurríkismenn verða nú að vinna Þjóðverja á mánudag og vona að Króatar vinni Pólverja til að eiga von um að komast í 8-liða úrslit keppninnar.