Mannskæð átök í Mongólíu

Fimm manns hafa látið lífið og um þrjú hundruð særst í átökum sem brutust út eftir þingkosningar í Mongólíu um síðustu helgi. Forsetinn Nambaryn Enkhbayar lýsti á föstudag yfir neyðarástandi í landinu í fyrsta skipti, vegna ofbeldisins.

Stjórnarandstöðuleiðtogar hafa sakað stjórnarflokkinn MPRP, sem hlaut hreinan meirihluta í kosningunum, um svik. Kannanir höfðu þó bent til þess að MPRP myndi sigra, og kosningaeftirlitsmenn sáu engin merki um svindl. Kommúnismi lagðist af í Mongólíu árið 1990 og síðan þá hafa kosningar yfirleitt farið friðsamlega fram. Ástandið nú kemur því Mongólum í opna skjöldu.