Svekkjandi tap fyrir Skotum

Skotland vann 2-1 sigur á Íslandi í undankeppni HM 2010 í kvöld en leikurinn fór fram á Laugardalsvelli.

Hægt var að fylgjast með leiknum á Miðstöð Boltavaktarinnar, visir.is/boltavakt, en þar má lesa nánar um gang leiksins með því að smella á hann.

Kirk Broadfoot kom Skotlandi yfir strax á átjándu mínútu og Barry Robson tvöfaldaði forskotið á þeirri 60. Eiður Smári Guðjohnsen minnkaði muninn á 77. mínútu úr víti en þar við sat.

Vítið var dæmt á Stephen McManus fyrir að handleika knötttinn innan teigs en hann fékk að líta rauða spjaldið fyrir vikið.

Ísland byrjaði miklu betur í leiknum og kom því markið þvert gegn gangi leiksins. Skömmu áður hafði Eiður Smári fengið algert dauðafæri er hann fékk skotfæri einn gegn markverði en þrumuskot hans hitti ekki markið.

Markið skoska kom eftir hornspyrnu sem var vel framkvæmd og fylgdi Broadfoot skallanum eftir af miklu harðfylgi.

Undir lok fyrri hálfleiksins bjargaði McManus svo á línu eftir að Hermann Hreiðarsson náði að stýra boltanum að markinu.

Ísland fékk þrjár hornspyrnur í upphafi síðari hálfleiksins en eins og með önnur föst leikatriði í leiknum voru þær illa nýttar. Bæði auka- og hornspyrnur voru langflestar mjög illa teknar sem þarf án nokkurs vafa að laga fyrir næsta leik.

Kristján Örn gerði sig svo sekan um klaufaleg mistök er hann braut á James McFadden í teignum. Víti var dæmt og McFadden tók spyrnuna en Kjartan varði. Þrír Skotar fylgdu þó eftir og Robson náði að pota honum inn. Hermann Hreiðarsson fyrirliði húðskammaði félaga sína fyrir kæruleysið.

Eftir þetta datt leikurinn niður enda mikið sjálfstraust komið í skoska liðið sem hafði í raun unnin leik í höndunum. En eftir því sem mínúturnar liðu komst Ísland aftur ágætlega inn í leikinn og Emil Hallfreðsson, sem var með bestu mönnum Íslands í leiknum, átti fína sendingu inn á teiginn. McManus varði boltann með höndinni þegar að Heiðar var í góðu færi og fékk að líta rauða spjaldið fyrir og víti var dæmt.

Eiður Smári tók spyrnuna af miklu öryggi og upphófst þá mikið kapphlaup hjá íslenska liðinu. Það reyndi sem það gat til að skapa sér færi en Skotar nýttu hvert einasta tækifæri til að tefja tímann.

Besta færið fékk Heiðar Helguson eftir sendingu Emils. Skotið hans fór í varnarmann og framhjá. Þar með var ljóst að Ísland mátti sætta sig við óverðskuldað og svekkjandi tap.

Dómari leiksins, Serge Gumienny frá Belgíu, var ævintýralega slakur og til efs að jafn slakur dómari hafi dæmt landsleik hér á Laugardalsvellinum. En allar hans stóru ákvarðanir voru réttar og hafði hann því ekki úrslitaáhrif á gang leiksins.

Sem fyrr segir átti Emil skínandi fínan leik. Varnarlínan var fín og kom Indriði af krafi inn í liðið eftir að hafa verið skipt inn á fyrir Bjarna Ólaf í hálfleik.

Aron Einar fór mjög vel af stað í leiknum og barðist fyrir hverjum einasta bolta. Hann var tekinn af velli í síðari hálfleik er farið var að draga af honum.

Stefán Gíslason byrjaði sömuleiðis vel og sinnti varnarhlutverki sínu mjög vel. En sóknarvinnan var slök, þá sérstaklega í síðari hálfleik.

Birkir Már á hægri kantinum átti hins vegar nokkuð slakan dag og náði hann þar með ekki að fylgja eftir ágætri frammistöðu í Noregi.

Heiðar Helguson hætti aldrei að berjast og náði í hreint ótrúlegan fjölda af aukaspyrnum og hreint grátlegt að þær voru ekki betur nýttar. En hann var ekki alveg jafn sterkur inn í teignum og hann var í Noregi en engu að síður er hann langbesti sóknarmaður Íslands um þessar mundir.

Eiður Smári var duglegur í þessum leik og nokkuð drífandi. Hins vegar var hann í strangri gæslu skosku varnarmannanna og komst hann upp með afar lítið. Hann hefði einnig átt að gera betur í færinu sem hann fékk í fyrri hálfleik, þegar staðan var enn jöfn.

Pálmi Rafn og Veigar Páll komu inn á í seinni hálfleik en höfðu lítil áhrif á leikinn.

Frammistaða íslenska liðsins gefur enga ástæðu til að örvænta, þvert á móti virðist þetta allt vera á uppleið hjá Ólafi Jóhannessyni og lærisveinum hans. Hugarfarið hjá leikmönnum var afar gott og ljóst að ef þetta heldur áfram á þessari braut munu stigin fylgja með. Íslenska liðið gat sjálfu sér um kennt hvernig fór í dag en það hefur nú fengið á sig fjögur frekar ódýr mörk í þessum fyrstu tveimur leikjum undankeppninnar.

Hins vegar eru fleiri jákvæð teikn á lofti en neikvæð og því full ástæða til að hlakka til næsta leiks.