Hefur borðað 23 þúsund Big Mac borgara

Bandaríkjamaðurinn Dan Gorske náði merkum áfanga í síðasta mánuði en hann hefur hesthúsað 23 þúsund Big Mac hamborgara á lífsleiðinni. Það var þann 17. maí árið 1972 sem Dan, sem er 54 ára gamall, tók þá ákvörðun að borða að minnsta kosti tvo Big Mac á dag og hann hefur að mestu staðið við það allan þann tíma. Þeir sem ekki leggja trúnað á þetta geta snúið sér til Dans því hann hefur samviskusamlega geymt hverja einustu kvittun fyrir borgurunum.

Þetta óvenjulega mataræði virðist þó ekki hafa farið illa með Dan, sem er 188 sentimetrar á hæð og um 88 kíló. Hann tekur þó fram að hann stundi líkamsrækt og gengur um 15 kílómetra á hverjum degi.

Á níunda áratugnum fékk hann sér alltaf franskar með borgurunum en hætti því á þeim tíunda. Nú fær hann sér bara franskar til hátíðabrigða, um það bil einu sinni í mánuði.

„Stundum er ég kallaður viðrini en það hefur engin áhrif á mig," segir Dan hress í bragði í viðtali við AP fréttastofuna. Átta sinnum hefur hann lent í því að fá engan Big Mac borgara yfir daginn. Einu sinni varð hann við hinstu ósk móður sinnar sem bað hann um að sleppa borgurunum daginn sem hún yrði jörðuð. „Ég lofaði henni því og ég stend alltaf við það sem ég segi. Ég lofaði henni einnig að ég myndi ekki skerða hár mitt og hef ekki gert það í 20 ár."

Tvisvar hefur hann misst af borgara vinnu sinnar vegna, en hann starfar í fangelsi í Wyoming. Þá hefur hann lent þrisvar sinnum í því að finna ekki McDonalds stað á ferðalagi auk þess sem hann sleppti Big Mac á þakkargjörðadaginn árið 2000. Árið 1982 kom mikið óveður í veg fyrir að McDonalds staðurinn í bænum hans gæti opnað og upp frá því hefur hann geymt nokkra borgara í frystinum til þess að hann lendi ekki í því aftur.