Bæjarbúum greitt fyrir að hægja sér í salerni

Bæjarstjórnin í Musiri í Tamil Nadu-héraðinu á Indlandi hefur nú brugðið á þá nýbreytni að greiða íbúunum fyrir að losa hægðir sínar í salerni. Launin fyrir þetta viðvik eru ekki ýkjahá, tæpar 11 krónur á mánuði, en það munar um hvern skilding í fátækari héruðum Indlands.

Tilgangurinn með salernisgreiðslunum er tvíþættur. Annars vegar að venja fólk af þeim landlæga og forna sið að ganga örna sinna þar sem það er statt hverju sinni og hins vegar að stuðla að notkun úrgangsins sem áburðar.

„Við erum að reyna að gera fólkið meðvitað um verðmæti úrgangs þess," sagði Marathi Subburaman, helsti talsmaður þessa nýja fyrirkomulags, og bætti því við að með þessu móti fengist gnótt áburðar auk þess sem notkun salerna drægi úr hættu á ýmsum smitsjúkdómum.

Talið er að um 330 milljónir Indverja skorti aðgang að lágmarkshreinlætisaðstöðu en ríkisstjórnin vinnur nú að því að bæta úr þessu aðstöðuleysi. Því fylgir að kynna þarf almenningi notkun hreinlætistækjanna og hvetja til hennar. Um 150 af íbúum Musiri nota nú salerni bæjarins en það er búið sérstökum söfnunartanki sem geymir úrganginn þar til honum er dreift sem áburði á akrana.

CNN greindi frá þessu.