Notuðu merki Rauða krossins við björgun gísla

Myndir frá því er leyniþjónustumenn frá kólombíska hernum björguðu gíslum úr haldi Farc-skæruliða þar í landi nýlega sýna að einn þeirra var með merki Rauða krossins á borða um handlegg sinn

Fréttamenn CNN stöðvarinnar hafa séð myndina og myndbandsupptöku sem sýnir sama hlutinn en myndirnar hafa ekki verið sýndar opinberlega. Hafi kolombísku hermennirnir notað merki Rauða krossins er það brot á ákvæðum Genfar-sáttmálans og telst til stríðsglæpa.

Sérfræðingar segja að slík misnotkun á merki Rauða krossins geti leitt til hættu fyrir raunverulega starfsmenn Rauða krossins. Stjórnvöld í Kólombíu hafna því alfarið að merki Rauða krossins hafi verið notað í hinni velheppnuðu aðgerð þann 2. júlí s.l.

Sem kunnugt er tókst hermönnunum að blekkja Farc-skæruliðana til þess að afhenda sér 15 gísla sem þeir höfðu haft í haldi um langt skeið. Meðal þeirra sem bjargað var er Ingrid Betancourt fyrrum forsetaframbjóðandi landsins.

CNN komst yfir myndina og myndböndin er einn af hermönnunum sem tóku þátt í aðgerðinni reyndi að selja fréttastöðinni þetta efni.