Kaþólikkar djamma í Sydney

Hátt í 200.000 kaþólsk ungmenni hvaðanæva úr heiminum eru þessa dagana samankomin í Sydney Ástralíu á hátíð sem hefur verið kölluð ,,Woodstock" kaþólsku kirkjunnar.

Yfir 250 bænasamkomur hafa verið haldnar víðsvegar um borgina sem og kristilegir rokktónleikar. Þar stal séra Stan Fortuna frá Bronx í New York senunni þegar hann rappaði og hin ítalska og kristna þungarokkshljómsveit Metatrone vakti einnig lukku.

Á morgun fimmtudag mun Benedikt XVI páfi heimsækja hátíðina en hann kom til Ástaralíu í fyrsta sinn síðastliðinn sunnudag. Hann mun hitta Kevin Rudd, forsætisráðherra, áður en hann siglir inn höfnina í Sydney og hittir ungmenninn.

Viðbúnaður lögregluyfirvalda í Sydney vegna hátíðarinnar og heimsóknar páfa er svipaður og þegar ólympíuleikarnir voru haldnir í borginni fyrir átta árum.