Enska biskupakirkjan logar í illdeilum

Enska biskupakirkjan logar í illdeilum vegna afstöðunnar til samkynheigðra biskupa og hvort víga eigi konur til prestþjónustu og einir 250 biskupar hafa kosið að sitja heima í mótmælaskyni við þá þróun sem uppi er.

Upphafið má, að verulegu leyti, rekja til þess að biskupinn í New Hampshire í Bandaríkjunum er opinberlega samkynhneigður. Honum var reyndar ekki boðið til ráðstefnunnar í Englandi - en er þar engu að síður á hliðarlínunum sem stöðug og vinsamleg áminning um að samkynhneigðir eigi einnig heima í kirkjunni. Ráðstefna af þessu tagi er haldin á tíu ára fresti.

Enska biskupakirkjan og skyldar kirkjur, sem varð til eftir að breska krúnan sagði sig undan valdi páfans í Róm um miðja sextándu öld, telur um 77 milljónir manna um allan heim.

Aðeins kaþólska kirkjan og rétttrúnaðarkirkjan eru fjölmennari kristnir söfnuðir.

Meðal þeirra sem sitja heima eru íhaldssamir biskupar í fjölmennum Afríku- og Suður-Ameríkuríkjum, sem hafa stofnað sérstök samtök.

Þótt erkibiskupinn af Kantaraborg sé andlegur leiðtogi biskupakirkjunnar, hefur hann engan veginn sömu stöðu og páfinn hefur í kaþólsku kirkjunni og nú fjölgar þeim biskupum sem leggjast gegn honum og valdi hans. Hinir íhaldssömu telja að Kristur hafi sjálfur ætlast til þess að aðeins karlar væru í forustu í kristinni kirkju.