Tugir innflytjenda myrtir í Suður-Afríku

Að minnsta kosti 22 innflytjendur hafa verið myrtir í Suður-Afríku undanfarna daga og fjölmargir særðir. Innflytjendurnir eru sakaðir um að taka vinnu og húsnæði af heimamönnum.

Árásirnar hófust í hverfum svertingja utan við Jóhannesarborg en hafa verið að breiðast út.

Innflytjendurnir halda sig oftast útaf fyrir sig og það er ráðist á hverfi þeirra og kveikt í húsunum. Margir hafa verið brenndir til bana, aðrir barðir í hel eða drepnir með sveðjum og hnífum.

Talið er að um fimm milljónir innflytjenda séu í Suður-Afríku. Þar af yfir þrjár milljónir frá Zimbabwe, þar sem fólk hefur flúið efnahagslegar þrengingar. Þótt hagvöxtur í SA hafi verið um fimm prósent síðastliðin fjögur ár er atvinnuleysi þar um 23 prósent.