Pólverjar sem hættu lífi sínu heiðraðir

Pólverjar sem hættu lífi sínu til þess að hýsa gyðinga á flótta undan Nasistum voru heiðraðir í Varsjá, höfuðborg Póllands, í dag.

Af þessu tilefni var rifjað upp hvernig ótrúlegustu aðferðir voru notaðar til þess að fela gyðinga og bjarga þeim þannig frá því að vera sendir í útrýmingarbúðir.

Þeir sem þetta gerðu settu sig sjálfir í hættu því þeir sem urðu uppvísir að því að taka gyðinga inn á heimili sitt og fela þá áttu það á hættu að verða skotnir.

"Á einum tímapunkti bjuggu hjá okkur níu einstaklingar sem þurftu á hjálp okkar að halda til þess að fela sig," sagði Waclaw Nowinski, 83 ára.

Hann er einn 60 aldraðra Pólverja sem heiðraðir voru í dag af hinum bandarísku JFR samtökum (Jewish Foundation for the Righteous).