Betancourt biðlar til FARC

Ingrid Betancourt biðlaði í dag til FARC að sleppa öllum gíslum sem skæruliðahreyfingin hefur í haldi.

Betancourt ávarpaði fjöldafund í París í dag en tilefni hans var baráttan gegn mannránum. Þúsundir söfnuðust saman í grennd við Eiffel turninn til þess að hlýða á ávarp Betancort sem sjálf var gísl FARC í meira en sex ár.

"Við viljum frelsi fyrir alla," sagði Betancourt við mikinn fögnuð viðstaddra sem margir hverjir svöruðu með því að hrópa "Libertad!".

Betancourt ávarpaði fjöldann á spænsku en ávarp hennar var sýnt í beinni útsendingu í kólumbísku sjónvarpi. Þar var einnig haldinn mikill fjöldafundur af sama tilefni.

Betancourt biðlaði til ríkistjórnar Kólubíu að enda átökin við skæruliðahreyinguna FARC og las upp lista með nöfnum þeirra sem FARC hafa enn í haldi.

FARC samtökin hafa barist við Kólumbísk stjórnvöld í 44 ár. Barátta þeirra er að mestu fjármögnuð með eiturlyfjasölu og gíslatökum.