Nýr Glitnir tekur til starfa

Nýr Glitnir tók til starfa í morgun undir stjórn Birnu Einarsdóttur, fyrrverandi framkvæmdastjóra viðskiptabankasviðs Glitnis. Þetta staðfesti Árni Tómasson, formaður skilanefndar bankans, í samtali við fréttastofu.

Hann sagði aðspurður að skilanefnd væri búin að fá tillögur í starfsmannamálum bankans en eftir ætti að ganga frá þeim. Um þúsund manns störfuðu hjá Glitni áður en hann var tekinn yfir. Árni bendir á að gripið hafi verið til hagræðingaraðgerða fyrr á árinu og hefur starfsmönnum Glitnis þegar fækkað um 250. Árni bjóst því ekki við að skellurinn yrði jafnþungur hjá Glitni og Landsbankanum, en þar var um 300 manns sagt upp.

Hinn nýi banki heitir Nýi Glitnir banki hf. og tekur yfir innlendar eignir Glitnis til þess að tryggja eðlilega bankastarfsemi og öryggi innstæðna á Íslandi. Alþjóðleg starfsemi Glitnis er hins vegar skilin frá eftir því sem segir á vef Fjármálaeftirlitsins. Öll útibú, þjónustuver, hraðbankar og netbanki Glitnis verða opin.

Bankinn verður að fullu í eigu ríkisins og segir Fjármálaeftirlitið að með ákvörðuninni sé tryggð áframhaldandi bankastarfsemi fyrir heimilin og fyrirtækin í landinu. „Í ákvörðuninni felst m.a. að nýi bankinn yfirtekur allar innstæðuskuldbindingar í bankanum á Íslandi og sömuleiðis stærstan hluta eigna bankans sem tengjast íslenskri starfsemi s.s. lán og aðrar kröfur.

Á næstu 30 dögum mun fara fram mat óháðs aðila á verðgildi eigna og skulda og lokauppgjör. Eigið fé nýja bankans verður 110 milljarðar króna sem ríkið leggur fram. Stærð efnahagsreiknings hins nýja banka verður um 1.200 milljarðar króna," segir á vef FME.

Birna Einarsdóttir, hinn ný bankastjóri, hóf störf hjá Íslandsbanka, forvera Glitnis, fyrir um fjórum árum sem framkvæmdastjóri sölu- og markaðsmála. Hún starfaði einnig að markaðsmálum hjá Royal Bank of Scotland í sex ár. Birna er viðskiptafræðingur frá HÍ og með MBA-próf frá Háskólanum í Edinborg.