Tveir franskir stúdentar grimmilega myrtir í Lundúnum

Tveir franskir stúdentar sem fundust stungnir til dauða í kjölfar eldsvoða á sunnudag höfðu verið bundnir og orðið fyrir hrottalegri árás samkvæmt upplýsingum frá lögregluyfirvöldum í Lundúnum.

Laurent Bonomo og Gabriel Ferez, báðir 23. ára gamlir, höfðu verið við nám í nokkra mánuði í London og stefndu á heimför í lok mánaðarins. Þeir fundust hins vegar látnir eftir bruna í íbúð Bonomo í Suð-austur London á aðfararnótt mánudags og vakti eldsvoðinn strax grunsemdir lögreglu.

Í ljós kom að piltarnir tveir höfðu orðið fyrir grimmilegri árás, þeir bundnir og barðir og að lokum stungnir til dauða áður en kveikt var í líkömum þeirra. Lögreglumenn sem komu að líkunum segja að þeir hafi aldrei séð aðra eins áverka.

Lögreglan hefur engar upplýsingar um ástæður morðanna en telur líklegt að árásarmennirnir hafi farið mannavillt. Lögreglan leitar nú árásarmannanna en hefur takmarkaðar vísbendingar.