Caroline Kennedy orðuð við varaforsetaframboð

Leitin að varaforsetaefni Barack Obama stendur nú sem hæst og meðal þeirra sem koma til greina er Caroline Kennedy.

Kennedy er lögmaður, stjórnmálaráðgjafi og rithöfundur en hún er einnig eina eftirlifandi afkvæmi John F. Kennedy bandaríkjaforseta. Í byrjun júní skipaði forsetaframbjóðandinn Barack Obama hana í valnefnd sem hefur það hlutverk að finna honum varaforsetaefni fyrir kosningarnar í vetur.

Þeir sem til þekkja segja mjög lítið fara fyrir Kennedy, hún sé einfaldlega manneskjan bak við tjöldin. Nú, þegar leitin að varaforsetaefni hefur staðið yfir í mánuð, verða þær raddir æ háværari í Washington sem segja hana sjálfa meira að segja koma til greina í þá stöðu. Obama hefur sjálfur sagt að þessi ákvörðun sé sú mikilvægasta sem hann taki fyrir kosningarnar og nú er bara að bíða og sjá hverju fram vindur á lokasprettinum.