Grunaður um að hafa myrt fyrrum unnustu

Lögregla í Vestur-Gautlandi í Svíþjóð rannsakar nú hugsanlegt morðmál eftir að 26 ára gömul kona fannst látin í íbúð fyrrverandi unnusta síns.

Unnustinn fyrrverandi var hvergi sjáanlegur en vinir konunnar höfðu samband við lögreglu þegar hún kom ekki að hitta þá á tilsettum tíma en hún var þekkt að stundvísi. Áverkar á líkinu gáfu til kynna að konan hefði verið myrt en lögregla neitar að gefa upp hvers kyns áverkarnir eru. Lýst var eftir unnustanum fyrrverandi og hafði lögregla hendur í hári hans um klukkan hálftíu í gærkvöldi að sænskum tíma. Hann sætir nú yfirheyrslum grunaður um að hafa ráðið sína fyrrverandi af dögum.