Segja Ísraelsher hafa æft árás á Íran

Ísraelsher er sagður hafa æft árás á Íran í byrjun mánaðarins.

Ísraelsher hefur í morgun hvorki viljað neita eða staðfesta fregnum þess efnis að loftárásir á Íran hafi verið æfðar í fyrstu viku júní.

Bandaríska blaðið New York Times greinir frá þessu í morgun og hefur eftir bandarískum sendifulltrúum. Samkvæmt frétt blaðsins var æft hvernig varpa ætti sprengjum á hernaðarlega mikilvæg skotmörk, þar á meðal kjarnorkuver.

Rúmlega hundrað herþotur Ísraela munu hafa verið notaðar í æfingunum sem munu hafa farið fram yfir austurhluta Miðjarðarhafs. Samkvæmt frétt blaðsins var þotunum flogið eins lagt og fljúga þarf frá Ísrael að Natanz í Íran þar sem auðgun úrans fer fram.

Þegar leitað var eftir viðbrögðum Ísraelshers við fréttinni í morgun voru einu svörin að flugher Ísraels væri reglulega með æfingar fyrir ýmis verkefni. Tilgangur æfinganna væri að mæta mögulegum ógnum gegn Ísraelsríki. Spurningum um hvort árás á Íran hefði verið æfð var í engu svarað.

Ehud Olmert, forsætisráðherra Ísraels, hefur lýst því yfir að hann vilji helst semja við Írana um að þeir leggi kjarnorkuáætlun sína á hilluna. Hann hefur ekki útlokað hernaðaraðgerðir til að ná því fram.