Given ekki á leið til Tottenham

Shay Given, markvörður Newcastle, segir ekkert hæft í þeim fregnum að hann sé á leið frá Newcastle til Tottenham í janúar næstkomandi.

Enskir fjölmiðlar hafa fullyrt að Harry Redknapp sé reiðubúinn að eyða um tíu milljónum punda í nýjan markvörð þar sem Heurelho Gomes hafi ekki staðið undir þeim væntingum sem gerðar voru til hans.

Given gekk til liðs við Newcastle í maí 1997 og á meira en 450 leiki að baki með félaginu. Og hann hefur ekki hug á því að skipta um félag nú.

„Ég held að þetta séu bara getgátur," sagði Given við enska fjölmiðla. „Félagið eyddi 7-8 milljónum punda í markvörð í sumar og ég tel ólíklegt að það muni eyða meiri pening í annan markvörð."

„Þetta eru bara vangaveltur í fjölmiðlum. Ég er viss um að þegar Gomes fær fullt sjálfstraust verði hann afar góður markvörður á nýjan leik."

„En þar fyrir utan hef ég engan áhuga á því að fara frá Newcastle. Ég er mjög ánægður þar sem ég er."