Norska undrabarnið ekki næst best í heimi

Skákheimurinn titrar af reiði vegna ákvörðunar FIDE að viðurkenna ekki árangur Magnus Carlsen þegar nýr listi yfir stigahæstu skákmenn heims var gefinn út í gær. Magnus ætti að vera sá næstbesti en endar í sjötta sæti.

FIDE ákvað að taka stórmótið Aerosvit ekki með í stigaútreikningi á bestu skákmönnum heims. Norska undrabarnið Magnus Carlsen vann stórsigur á mótinu og ætti með réttu að vera næst bestur í heimi.

FIDE birti stigalistann í gær. Einu sinni áttum við Íslendingar okkar fulltrúa á listanum, Jóhann Hjartarson, en nú er enginn Íslendingur með þeirra hundrað bestu í heimi. Besti skákmaður í heimi er Indverjinn Anand með 2798 stig en í sjötta sæti er sautján ára gamla norska undrabarnið með 2775.

Það eru Norðmenn ekki sáttir við. Ef Aerosvit mótið hefði verið tekið með í stigaútreikninginn væri Magnus Carlsen í öðru sæti. Mótið kláraðist hins vegar fjórum dögum eftir tímamörk FIDE á útreikningi á stigalistann.

Almenningur og fjölmiðlar segja að ekki eigi að breyta skáksögunni út af reglufestu FIDE. Áður hafi verið gerðar undanþágur og þegar svona mikið liggi við eigi að nota nýjustu úrslit - þegar þau liggi fyrir.

Ef FIDE myndi viðurkenna árangur Magnus Carlsen væri hann búinn að skrifa nafn sitt á spjöld skáksögunnar. Aldrei áður hefur jafn ungur skákmaður náð öðrum eins árangri - þó Bobby Fischer hafi orðið sá besti í Bandaríkjunum löngu fyrir tvítugt tók barátta hans fyrir því að verða sá besti í heimi lengri tíma.

Magnus Carlsen er þjóðhetja í Noregi og er ljóst að frændur okkar Norðmenn muni ekki taka þessu þegjandi.