Sjö létust í ólöglegum kappakstri

Sjö manns létust þegar bíll keyrði inn í mannþröng í ólöglegum kappakstri í Maryland í Bandaríkjunum. Slysið varð klukkan tuttugu mínútur í níu í morgun að íslenskum tíma, um 32 kílómetrum frá Washington DC, höfuðborg Bandaríkjanna. Auk þeirra sjö sem létust slösuðust fjórir, að sögn lögreglunnar. Ekki er vitað nánar um ástand hinna slösuðu.

Bíllinn sem fór út af var hvítur fólksbíll sem rakst á hóp áhorfenda sem stóð í vegakantinum. Ekki er ljóst hvort fólkið tók þátt í kappakstrinum á einhvern hátt. Dráttarvélarkerra fylgdi á eftir hvíta bílnum en ekki er ljóst hvort að hún hafi rekist á eitthvað af fólkinu.

„Það voru lík út um allt. Þetta var hræðilegt," sagði hin 27 ára gamla Crystal Gaines, en faðir hennar lést í slysinu. „Hann andaði ekki og hann hreyfði sig ekki," sagði hún. „Líkið af honum var allt í molum," sagði hún svo.