Ráðsmaður Díönu laug um hring

Paul Burrell fyrrverandi ráðsmaður Díönu prinsessu kom fram sem vitni við réttarrannsóknina á dauða hennar í dag. Þar sagðist hann af ásettu ráði hafa haldið því leyndu að Dodi Fayed hafi gefið prinsessunni hring skömmu áður en þau létust í bílslysi.

Árið 2003 skrifaði Burrell að allt sem hann vissi um hring væri frá samtölum við prinsessuna sumarið 1997. Þar ráðlagði hann henni að vera með hringi á hægri hendi til að forðast að gefa í skyn að hún væri trúlofuð.

Í bók sinni A Royal Duty segir hann; „Við töluðum aldrei aftur um hring eða hvort hún hefði fengið hring."

Við réttarrannsóknina viðurkenndi hann að meðal eigna hennar sem hann sótti eftir að hún dó hafi verið hringur.

Þegar hann var sakaður um lygar í bókinni sagði hann að ástæða þess að hann sagði ekki frá því í bókinni væri sú að honum hefði ekki fundist hann þurfa að gera það. Í næstu bók The Way We Were sem skrifuð er nokkrum áðum síðar sem nokkurs konar framhald, gaf Burrel meiri upplýsingar um hringinn.

„Svo mikið var sagt um prinsessuna að ég varð að hrekja ... goðsögnina," sagði hann.

Burrell hélt því einnig fram að Díana hefði enn verið ástfangin af hjartaskurðlækninum Hasnat Khan, en ekki Dodi, í aðdraganda dauða hennar í ágúst 1997.

„Ég vissi að hún myndi ekki trúlofa sig," sagði hann réttinum. Þá var hann spurður af Michael Mansfield lögmanni „Þú telur þig vita það, en í raun veistu það ekki, er það." Þá svaraði Burrell; „Ég veit það ekki."

Hann var sammála Mansfield að áhyggjur hafi verið innan krúnunnar sumarið 1997 vegna vinskapar Díönu við Fayed fjölskylduna og pólitíska afstöðu hennar til jarðsprengja. En hann svaraði spurningu Mansfield og staðhæfði að Philip drottningamaður hefði ekki kallað Dodi „olíukenndan beddahoppara."