Krefst þess að auðmenn komi að uppbyggingunni eða sleppi því að koma heim

Steingrímur J. Sigfússon, formaður Vinstri grænna, krefst þess að auðmenn komi heim og leggi þeirri uppbyggingu sem er að hefjast lið. Geri þeir það ekki geti þeir sleppt því að láta sjá sig á götum úti.

Geir H. Haarde, forsætisráðherra, flutti í dag á Alþingi munnlega skýrslu um stöðu bankakerfisins. Í umræðum um skýrsluna sagði Steingrímur að mikilvægast væri að koma í veg fyrir atvinnuleysi og landflótta. Reynsla Færeyinga sem gengu í gegnum mikla kreppu 1990 ætti að nýtast okkur en þá flúðu ríflega 10% þjóðarinnar land. ,,Reynum að sjá til þess að sem flest störf verði í boði hérna heima."

Steingrímur spurði hvernig heilt samfélag gat verið svona meðvirkt og ekki áttað sig á því í hvað stefndi. ,,Örfáar raddir reyndu að vara við og benda á það sem væri að gerast. Fjölmiðlar, fræðasamfélag og stærstur hluti stjórnmálanna í algjörum faðmlögum við viðskiptalífið og fjármálamennina sem réðu förinni með þjóðhöfðingann sjálfan í fararbroddi. Hvernig gat þetta gerst?"

Margþætt verkefni þarf að vinna, að mati Steingríms sem telur að ekki gefist ráðrúm til að huga einungis að björgunaraðgerðum. Huga verði samhliða að öðrum málum svo hægt sé að vinna að nýju og breyttu samfélagi. Uppbyggingin verði að hefjast.

Steingrímur gagnrýndi verkstjórn forsætisráðherra og sagði að hann gæti verið skörulegri. Stjórnarliðar gangi ekki í takt og annar stjórnarflokkurinn, Samfylkingin, telji sig hafa efni á að þjóna lund sinni. ,,Við þetta er ekki auðvelt að búa. Af hverju gengur ríkisstjórnin ekki samhent fram og leggur deilumál til hliðar?" spurði Steingrímur.

Boða á til nýrra kosninga svo hægt sé að mynda nýja ríkisstjórn, að mati Steingríms sem telur að þjóðin þurfi að velja sér nýja fulltrúa. Hann lauk ræðu sinni á þeim orðum að í lýðræðisríki spretti allt vald frá þjóðinni.