Við skrifum undir ef Írar skrifa undir

Lech Kaczynski, forseti Póllands, sagði í dag að hann muni skrifa undir Lissabon sáttamálan ef Írar geri slíkt hið sama.

Kaczynski, sem sagður er varkár í Evrópumálum, setti allt á annan endan í gær þegar hann sagði það tilgangslaust að skrifa undir Lissabon sáttmálan fyrst honum hafi verið hafnað í þjóðaratkvæðagreiðslu á Írlandi.

Hann dró hins vegar aðeins í land í dag. "Ef Írland skrifar undir þá mun Pólland skrifa undir," sagði Kaczynski í sjónvarpsviðtali sem sýnt var í pólska ríkissjónvarpinu nú í kvöld.

Lissabonsáttmálinn á að koma í stað nýrrar stjórnarskrár Evrópusambandsins sem var felld í þjóðaratkvæðagreiðslu í Frakklandi og Hollandi árið 2005.

Írar hafa einir þjóða í ESB borið sáttmálann undir atkvæði þjóðarinnar. Þeir felldu sáttmálann og nú er ljóst að það er alls óvíst hvort Tékkar samþykkja hann.

Nicolas Sarkozy, forseti Frakklands, segir að ekki sé hægt að ræða um stækkun ESB fyrr en sáttmálinn hefur verið staðfestur af öllum ríkjunum 27. Nú hafa aðeins 19 ríki staðfest sáttmálann.