Arshavin tilbúinn að fara frá Zenit

Andrei Arshavin segist nú reiðubúinn að fara frá rússneska Zenit St. Pétursborg sem hann hefur leikið með allan sinn atvinnumannaferil.

Arshavin er 27 ára gamall og sló í gegn með rússneska landsliðinu á EM 2008 í Austurríki og Sviss. Rússar komust í undanúrslit en töpuðu þá fyrir verðandi Evrópumeisturum Spánar.

„Ég myndi vilja fara til annars félags," sagði Arshavin við fréttamenn eftir að rússneska landsliðið hitti Dmitry Medvedev Rússlandsforseta í dag.

Hann hefur verið orðaður við Barcelona og rússneskir fjölmiðlar hafa haft eftir forráðamönnum Zenit að Börsungar hafi gert þeim tilboð í Arhavin.

Sjálfur gat Arshavin ekkert sagt um sína framtíð, enn væri margt óráðið.