Þrettán dæmdir fyrir íkveikjur í Danmörku

Þettán piltar hafa verið dæmdir í allt að eins og hálfs árs fangelsi fyrir að kveikja elda í Albertslund og Ballerup í Danmörku í febrúar síðastliðnum.

Kveikt var í húsum og ruslagámum víða í Danmörku í þeim mánuði en með því vildu ungmenni mótmæla því að dönsk blöð endurbirtu skopmyndir af Múhameð spámanni. Það gerðu blöðin eftir að upp komst um áform manna um að ráða einn af teiknurum Jótlandspóstsins af dögum.

Í málinu sem dæmt var í í dag voru 14 manns ákærðir fyrir að kveikja í viðskiptaskóla, ráðhúsi og tveimur póstbílum. Einn var sýknaður en ellefu hinna ákærðu hlutu á bilinu eins til eins og hálfs árs fangelsi, en hluti dómanna var skilorðsbundinn eftir því sem segir á vef danska ríkisútvarpsins.