Helmingur óreykjandi Bandaríkjamanna veður reyk

Merki um óbeinar reykingar finnast í helmingi allra Bandaríkjamanna sem reykja ekki. Þetta kemur fram í rannsókn sem U.S. Center of Disease Control and Prevention birti fyrir helgina.

Óbeinar reykingar auka hættu á hjartasjúkdómum og lungnakrabbameini hjá fullorðnum en astma, öndunarfærasýkingum og jafnvel dauða hjá börnum. Í niðurstöðum rannsóknarinnar kemur fram að reykingar nálægt þeim sem ekki reykja hafi dregist saman um 70 prósent frá því seint á níunda áratugnum til ársins 2002 vegna banns við reykingum á vinnustöðum og víða annar staðar innandyra. Þetta hafi þó að sumu leyti reynst skammgóður vermir þar sem það hafi ekki nægt til að fjarlæga agnir af kótiníni úr blóði þeirra sem ekki reykja en kótinín er nikótínafurð (e. byproduct).

Landlæknir Bandaríkjanna hefur nú komist að þeirri niðurstöðu að eingöngu með því að útrýma reykingum innandyra algjörlega verði komið í veg fyrir heilsuspillandi áhrif reykinga á þá sem ekki reykja. Talið er að 61 prósent bandarískra barna á aldrinum fjögurra til ellefu ára komist í tæri við sígarettureyk en hlutfallið fer svo lækkandi eftir því sem aldurinn hækkar og er 42 prósent fyrir 20 ára og eldri. Langoftast er það á heimilunum sem börnin verða fyrir sígarettureyk.

Bloomberg greindi frá.