Náum bin Laden fyrst, segir Obama

„Ég hugsa að ef við næðum Osama bin Laden á lífi tækjum við ákvörðun um að beita ekki bara réttarvörslukerfi Bandaríkjanna heldur alls heimsins af fullum þunga gegn honum," sagði Barack Obama, forsetaframbjóðandi Demókrataflokksins í Bandaríkjunum, í viðtali við Fareed Zakaria í þættinum GPS á sjónvarpsstöðinni CNN.

Zakaria spurði Obama hvað hann hefði hugsað sér að gera við bin Laden næðist hann á lífi. Obama bætti því við að hann væri enginn talsmaður dauðarefsingar og hennar ætti aðeins að krefjast þegar um andstyggilegustu glæpi væri að ræða. Að skipuleggja og framkvæma aðgerð sem hefði í för með sér dauða 3.000 Bandaríkjamanna væri eitthvað sem réttlætt gæti dauðarefsingu.

„Þetta er þó allt á hugmyndafræðilega stiginu," sagði Obama að lokum. „Náum honum fyrst."