Börðust við stórbruna í Kaupmannahöfn í alla nótt

Slökkvilið Kaupmannahafnar hefur barist í alla nótt við mikinn eldsvoða í vöruflutningamiðstöð í Mileparken í Herlev.

Tilkynnt var um eldsvoðann skömmu eftir miðnættið í nótt. Allt tiltækt slökkvilið í borginni var sent á staðinn og jafnframt voru íbúar sem búa norður af miðstöðinni aðvaraðir um mikinn reyk sem lagði í þá átt frá eldhafinu.

Voru íbúarnir beðnir um að halda sig innandyra og hafa alla glugga á íbúðum sínum lokaða. Hinsvegar var ekki talið að hættulegar eiturgufur væru í reyknum.

Nú eru um tugur slökkvibíla á svæðinu og danskir fjölmiðlar hafa það eftir varðastjóra lögreglunnar á svæðinu að búið sé að komast fyrir það versta. Hinsvegar verði slökkvistarfi ekki endanlega lokið fyrr en undir hádegið.

Á þessari stundu liggur ekkert fyrir um eldsupptök en rannsókn á brunanum hefst um leið og slökkviliðið hefur lokið störfum sínum.