12 ára drengur barði 18 mánaða stúlku til dauða

Tólf ára drengur í Miami hefur verið dæmdur til refsivistar á unglingaheimili fyrir að berja 18 mánaða stúlku til dauða. Drengurinn var úrskurðaður hæfur til að fara fyrir rétt af sálfræðingum en slapp við fangelsisvist.

Drengurinn var, ásamt bróður sínum, að passa stúlkuna sem hét Shaloh Joseph í janúar. Hann barði hana með priki því hún grét svo hátt meðan hann var að horfa á sjónvarpið.

Þegar lögreglan kom á staðinn var stúlkan látin.

Móðir drengsins hélt ávallt fram sakleysi hans. Í upphafi virtist drengurinn ekki átta sig á gjörðum sínum en sálfræðingar segja að hann hafi með tímanum tekið framförum. Undir það síðasta hafi hann náð þeim þroska að vita hvað hann hefði gert - og að það hafi verið rangt.

Þar með var drengurinn tilbúinn til að fara fyrir rétt í Bandaríkjunum. Þau réttarhöld urðu hins vegar aldrei því sátt náðist og drengurinn var dæmdur í átján mánaða öryggisvist á rammgirtu unglingaheimili.

Lögfræðingur drengsins sagði hann hafa fengið annað tækifæri - fangelsi hefði eyðilagt framtíð hans.