Foreldrar sex ára fegurðardrottningar drápu hana ekki

Yfirvöld i Bandaríkjunum hafa loksins hreinsað fjölskyldu JonBenet Ramsey af grun um að hafa átt hlut í dauða hennar. JonBenet var drepin árið 1996 þegar hún var sex ára og dáð fegurðardrottning í heimabæ sínum.

Morðið á JonBenet er eitt umtalaðasta morðmál Bandaríkjanna. Litla stúlkan hafði nýlega verið krýnd fegurðardrottning í fegurðarkeppni sem haldin var fyrir börn þegar hún fannst myrt skammt frá heimili sínu.

Foreldrar JonBenet voru harðlega gagnrýndir fyrir að hafa ýtt henni út í slíka keppni og voru frá upphafi grunuð um að hafa valdið dauða hennar með einum eða öðrum hætti.

Ekkert gekk hins vegar í rannsókninni. Tíu árum eftir morðið komst málið aftur í hámæli þegar bandarískur maður, John Mark Kerr var handtekinn í Tælandi eftir að hafa játað á sig málið. Síðar kom í ljós að hann hafði sjúklegan áhuga á málinu en hafði ekki drepið stúlkuna.

Nú er morðið á JonBenet aftur komið í heimsfréttirnar. Með nýrri DNA tækni tókst rannsóknaraðilum að útiloka fjölskyldu JonBenet af lista grunaðra. Náðst hafa DNA sýni sem sanna að ókunnur karlmaður hafi handfjatlað stúlkuna áður en hún dó.

Næsta skref í rannsókninni er að bíða eftir að DNA mannsins komi fram í gagnagrunnum í Bandaríkjunum.