Bankaránum í Danmörku fjölgar um helming milli ára

Bankaránum í Danmörku hefur fjölgað um helming það sem af er árinu miðað við sama tíma í fyrra. Berlingske Tidende greinir frá því að ránin í ár séu 58 samanborið við 39 í fyrra.

Samtök fjármálafyrirtækja í Danmörku harma þetta enda hafði ránum fækkað mjög reglulega frá tímabilinu 2000 til 2002 þegar yfir 200 bankarán voru framin í landinu yfir allt árið. Þróunin í ár sé því í þveröfuga átt en á hinn bóginn verði að líta til þess að ræningjarnir hafi sjaldnast haft mikið upp úr krafsinu, oftast upphæð á bilinu 20 - 30.000 danskar krónur, auk þess sem meira en helmingur þeirra rána sem framin hafa verið í ár teljist nú þegar upplýst.

Tjón bankanna vegna þessa sé því ekki ýkjamikið en hins vegar verði sum bankaútibú oftar fyrir barðinu á ræningjum en önnur. Því hafi verið gripið til þess ráðs í vinsælum ránsútibúum að koma upp öryggismyndavélakerfi sem vaktar svæðið fyrir utan bankana auk þess að taka í notkun vélrænan búnað sem taki við eða afhendi peninga með þeim hætti að ekki sé hægt að öðlast aðgang að reiðufé nema þegar viðskipti við gjaldkera eiga sér stað og þá aðeins þá upphæð sem viðskiptin snúast um.