Jóhann: Óeðlileg samskipti við Björn

Jóhann R. Benediktsson, fráfarandi lögreglustjóra á Suðurnesjum, segir að frá því að tilkynnt var í mars um að skipta eigi lögregluembættinu upp hafi samskipti sín við Björn Bjarnason, dómsmálaráðherra, verið óeðlileg. Jóhann var gestur í Kastljósi fyrr í kvöld.

Nýverið var Jóhanni sagt að staða lögreglustjóra á Suðurnesjum yrði auglýst. Á fundi með samstarfsfólki í dag tilkynnti Jóhann að hann ætlar að láta af störfum 1. október. Þá hafa þrír lykilstarfsmenn hjá embættinu einnig tilkynnt um afsögn sína. Félagsmenn í Lögreglufélagi Suðurnesja eru ósáttir með dómsmálaráðherra.

Jóhann segir að aðdragandi málsins sé langur, en ákveðin kaflaskipti hafi orðið í mars þegar dómsmálaráðherra hafi tilkynnt að hann hygðist skipta embættinu upp. Sú ákvörðun ráðherra hafi verið fyrirvaralaus og án nokkurs samráðs við fag- og stéttarfélög eða yfirstjórn embættisins.

Samskipti Jóhanns og Björns hafa verið lítil sem engin frá því í mars. Þeir áttu einn fund og sat fundarritari fundinn ,,Það þótti mér undarlegt og mér voru sendir punktar í framhaldinu," sagði Jóhann og bætti við að þetta séu ekki eðlileg samskipti tveggja einstaklinga.

Jóhann segir að það hafi verið fyrirsláttur hjá Birni að auglýsa til umsóknar stöðu lögreglustjóra á Suðurnesjum. Þegar Jóhanni var tilkynnt um ákvörðunina var honum sagt að það væri vægasta úrræðið og telur Jóhann að ráðuneytið hafi íhugað að segja honum upp. Ekki var minnst á skipulagsbreytingar og segir Jóhann að það hafi komið sér á óvart þegar hann heyrði dómsmálaráðherra skömmu síðar tala um að ákvörðunin tengdist skipulagsbreytingum.