Búist við sigri Hun Sen í Kambódíu

Þingkosningar voru í Kambódíu í dag og er fastlega búist við ótvíræðum sigri Huns Sens, forsætisráðherra sem hefur verið við völd lengur en nokkur annar þjóðarleiðtogi í Asíu - eða allt síðan hann sagði skilið við Rauðu Khmerana á sínum tíma og var settur til valda af Víetnömum 1985.

Hun Sen hefur orð á sér fyrir að vera hörkutól sem ekki líður andstöðu. Helsti stjórnarandstæðingurinn í landinu, Sam Rainsy, segir að þúsundir stuðningsmanna sinna í höfuðborginni Phnom Penh hafi verið þurrkaðir út af kjörskrám. Kjörstöðum var lokað í morgun, að íslenskum tíma, og er reiknað með úrslitum á næstu sólarhringum.

Kosningarnar í Kambódíu voru haldnar í skugga spennu á landamærunum við Thailand þar sem hermenn beggja ríkjanna standa gráir fyrir járnum við Búddahof frá elleftu öld. Þjóðernistilfinningar hafa risið hátt í báðum löndunum - sem hefur ekki dregið úr stuðningi almennings við Hun Sen.

Thailands megin landamæranna eru það einkum andstæðingar stjórnarinnar í Bangkok sem vilja gæta sóma og hagsmuna þjóðar sinnar og um leið eru þeir að sýna andstöðu við Bangkok-stjórnina sem studdi viðleitni Kambódíumanna til að fá hofið sett á heimsminjaskrá Sameinuðu þjóðanna. Hofið stendur á rúmlega fjögrra ferkílómetra svæði sem hefur verið umdeilt allt síðan franska nýlendustjórnin fór frá Kambódíu skömmu eftir 1950.

Kambódíumenn hafa leitað liðsinnis Sameinuðu þjóðanna við lausn Búddahofs-deilunnar - en Thailendingar vilja leysa málið í beinum viðræðum.