Gríðarlegur viðbúnaður vegna fundar G8-leiðtoga í Japan

Gríðarlegar öryggisráðstafanir verða gerðar í Japan vegna fundar leiðtoga iðnríkjanna átta sem þar hefst á mánudag. Herskip, þyrlur og þúsundir hermanna verða í viðbragðsstöðu á meðan á fundinum stendur.

Fundurinn verður á Hokkaido-eyju, en öryggisráðstafanir eru um allt land. Íbúar í Tókýó verða að búa við tafir og alls konar öryggisgæslu vegna fundarins eins og aðrir landsmenn.

Leiðtogar Bandaríkjanna, Japans, Þýskalands, Bretlands, Frakklands, Rússlands, Ítalíu og Kanada mæta á fundinn í Japan. Stjórnvöld þar eru við öllu búin og hafa kallað út um 40 þúsund hermenn. Helmingur þeirra verður í kringum hótelið þar sem leiðtogafundurinn verður um 750 kílómetra norður af Tókýó.

Þá verða notaðar um 20 þyrlur og fjöldi herskipa verður úti fyrir ströndum. Enn fremur hafa japönsk yfirvöld undirbúið að bregðast skjótt við hugsanlegum flugránum.