Vill að 630 milljarða arfur fari í hundana

Áætlað er að eignir fasteignadrottningarinnar Leonu Helmsley sem lést fyrir tæpu ári nemi um átta milljörðum bandaríkjadala, jafnvirði tæpra 630 milljarða króna.

Helmsley gaf þau fyrirmæli fyrir dauða sinn að þessari myndarlegu upphæð skyldi varið til styrktar hundum. Það er ekki ofsögum sagt að Helmsley hafi í lifanda lífi verið mikill hundavinur en sú ákvörðun hennar að arfleiða hund sinn Trouble að 12 milljónum dala endaði fyrir dómstólum.

Í erfðaskránni gerði hún tvö barnabörn sín arflaus en hundurinn hlaut alla summuna. Breytti dómstóll þessari ákvörðun og dýrið varð að lifa með því að fá tvær af milljónunum 12. Nú deila lögspekingar um hvort ákvörðunin um milljarðana átta geti staðist en hennar var hvergi getið í erfðaskrá, aðeins í tilmælum hinnar látnu.