Unglingadrykkja eykst mikið í Rússlandi

Drykkja unglinga hefur aukist um þriðjung í Rússlandi undanfarin þrjú ár. Unglingarnir drekka sterka drykki og blanda þá með orkudrykkjum.

Unglingaskemmtistaðir hafa sprottið upp í Moskvu undanfarin ár og sérfræðingar telja að það hafi haft mikil áhrif á aukna drykkju unglingna. Sala á bjór hefur aukist mikið, en það eru ekki unglingarnir sem velja hann. Þeir vilja frekar sterku drykkina, sem þeir blanda með alls konar orkudrykkjum í öllum regnbogans litum.

Læknar hafa reynt að miðla skaðsemi áfengis til unglinga, en allt kemur fyrir ekki. Unglingar drekka þriðjungi meira áfengis nú en fyrir þremur árum. Þeir láta upplýsingar um skaðsemi áfengis sem vind um eyrum þjóta, en það sem læknar hafa einnig miklar áhyggjur af er að örkudrykkir geta verið varasamnir, sérstaklega sé þeim blandað við áfengi.

Algengt er að unglingar í Moskvu drekki nokkra orkudrykki á dag. Þeir segjast nota þá fyrir íþróttakappleiki svo þeim gangi betur í leiknum en einnig svo þeim gangi betur í prófum.