Árás á Íran mun draga stóran dilk á eftir sér

Bashar al-Assad, forseti Sýrlands, segir að árás á Íran muni verða Bandaríkjunum, Ísrael og heiminum öllum afar dýrkeypt. Þetta sagði Assad í viðtali við franska útvarpsstöð í morgun en forsetinn er staddur í Frakklandi á fundi nýstofnaðs Miðjarðarhafsbandalags.

Íranar hafa hótað því að svara af fullum krafti verði ráðist inn í landið og segja þeir að fyrstu skotmörk þeirra yrðu Tel Aviv í Ísrael og skip Bandaríkjahers í Persaflóa. Íranar skvettu síðan enn meiri olíu á eldinn í síðustu viku með því að því að skjóta flugskeytum í æfingaskyni.

Að mati Assad er aðaláhyggjuefni heimsins ekki hvort Íranar muni svara árásum, því það muni þeir sannarlega gera. Ráðamenn heimsins þurfi frekar að hafa áhyggjur af því að atburðarrásin gæti farið í úr böndunum í kjölfarið og haft gríðarlega alvarlegar afleiðingar fyrir svæðið næstu árin eða áratuginn.

Assad hefur lengi þótt með betri vinum stjórnvalda í Íran og að beiðni Sarkozy Frakklandsforseta ætlar hann sér að nýta þessi góðu sambönd til að leita lausna á deilunni.