ESB stækkar ekki fyrr en Lissabon-sáttmáli verður samþykktur

Ekkert verður af stækkun Evrópusambandsins fyrr en aðildarríkin hafa staðfest Lissabonsáttmálann. Írar höfnuðu sáttmálanum í þjóðaratkvðagreiðslu og óljóst er hvort Tékkar samþykkja sáttmálann.

Leiðtogar Evrópusambandsríkjanna 27, sem nú funda í Brussel, ræða þá stöðu sem upp er komin eftir að Írar höfnuðu Lissabonsáttmálanum í þjóðaratkvæðagreiðslu. Sáttmálinn á að koma í stað nýrrar stjórnarskrár Evrópusambandsins sem var felld í þjóðaratkvæðagreiðslu í Frakklandi og Hollandi árið 2005.

Írar hafa einir þjóða í ESB borið sáttmálann undir atkvæði þjóðarinnar. Þeir felldu sáttmálann og nú er ljóst að það er alls óvíst hvort Tékkar samþykkja hann. Nicolas Sarkozy, forseti Frakklands, segir að ekki sé hægt að ræða um stækkun ESB fyrr en sáttmálinn hefur verið staðfestur af öllum ríkjunum 27. Nú hafa aðeins 19 ríki staðfest sáttmálann.

Frakkar taka við forystu í ESB í næsta mánuði og ætla að ræða sérstaklega við Íra og Tékka um næstu skref. Leiðtogar ESB fjalla á fundum sínum um dýrtíðina í Evrópu vegna hækkunar á olíu. Mikil mótmæli hafa verið í Evrópuríkjum vegna hækkunar á olíu og ráðamenn í einstökum ríkjum hafa vísað til þess að ríkin geti ekkert aðhafst í málinu, Evrópusambandið verði að taka ákvarðanir umsameiginlegar aðgerðir.