Romney líklegt varaforsetaefni

Talið er líklegt að John McCain forestaframbjóðandi Repúblikanaflokksins bjóði Mitt Romney, fyrrverandi fylkisstjóra í Massachusetts, að verða varaforsetaefni sitt.

Romney tók þátt í forvali Repúblikanaflokksins fyrir forsetakosningarnar í Bandaríkjunum en játaði sig sigraðan í byrjun febrúar. Skömmu síðar lýsti hann yfir fullum stuðningi við John McCain.

Romney er sagður sækjast fast eftir sætinu og meðal annars sagt að það væri heiður fyrir sig fengi hann slíkt boð.

Nánustu samstarfsmenn McCain hafa lítið látið eftir sér varðandi varaforsetaefni framboðsins. Í gær hrósaði McCain Romney og þakkaði honum fyrir aðstoðina í kosningabaráttunni.