30 fluttir á sjúkrahús í Gautaborg

Rúmlega 30 voru fluttir á sjúkrahús í kjölfar slyssins í skemmtigarðinum Liseberg í Gautaborg fyrr í dag í kjölfar þess að leiktæki sem sveiflar fólki til og frá féll til jarðar.

Fjölmörg íslensk ungmenni eru í Gautaborg þessa dagana vegna árlega fótboltamótsins Gothia Cup. Talsverður fjöldi þeirra var í garðinum þegar slysið varð en enginn Íslendingur mun hafa verið í leiktækinu.

Ríkissjónvarpið hafði fyrr í kvöld eftir Gunnari Hólmsteini Ársælssyni sem varð vitni að óhappinu að margir hafi kastast úr leiktækinu og einhverjir hafi orðið undir tækinu.