Fundu teikningar af Auschwitz-búðunum

Teikningar af útrýmingarbúðum nasista í Auschwitz í Póllandi fundust í Berlín um helgina.

Þýska dagblaðið Bild greinir frá því að 28 blaðsíður af teikningum sem talið er augljóst að séu af hinum illræmdu Auschwitz-Birkenau-útrýmingarbúðum skammt vestur af Kraká í Póllandi. Á teikningunum má glögglega sjá herbergi sem merkt er Gaskammer eða gasklefi og annað sem ber einfaldlega titilinn Leichenkeller, eða líkkjallari, svo huggulega sem það hljómar.

Hans-Dieter Kreikamp, forstöðumaður ríkisskjalasafnsins í Berlín, segir teikningarnar vera óræka sönnun helfararinnar og þess ætlunarverks nasista að útrýma evrópskum gyðingum á skipulegan hátt en hópur svokallaðra endurskoðunarsinna, sem meðal annars sagnfræðingar skipa, hefur látið í veðri vaka að helförin hafi í raun verið áróðursbragð gyðinga.

Teikningarnar eru merktar dagsetningunni 23. október 1941 og teljast stórmerkilegt sagnfræðilegt gagn séu þær ófalsaðar. Blaðamaður Bild skrifar að hverjum þeim, sem komið hafi á einhvern hátt að skipulagningu Auschwitz-búðanna, hafi hlotið að vera fullljós hinn myrki tilgangur þeirra.

Áætlað er að á tímabilinu frá hausti 1941 til ársins 1944 hafi um það bil 1,1 milljón gyðinga týnt lífinu í Auschwitz en búðirnar illræmdu voru einnig starfsvettvangur Josefs Mengele, hins svonefnda engils dauðans, sem stundaði vafasama læknisfræði sína í skjóli þriðja ríkis Adolfs Hitler.