Yoko verðlaunaði íslensku þjóðina og Vandana Shiva

Yoko Ono afhenti Ólafi Ragnari Grímssyni, forseta Íslands, og dr. Vandana Shiva, umhverfissinna, LennonOno friðarviðurkenningu ársins 2008 við hátíðlega athöfn í Höfða í dag.

Hvorri viðurkenningunni fyrir sig fylgir 50.000 dollara peningagjöf til styrktar verkefnum í þágu friðar. Forseti Íslands tók við gjöfinni fyrir hönd íslensku þjóðarinnar og afhenti í framhaldi af því fulltrúa Rauða kross Íslands peningagjöfina. Rauði krossinn hyggst nýta verðlaunaféð til að gefa ungmennum í Palestínu og á Íslandi tækifæri til að hafa samskipti sín á milli.

Dr. Vandana Shiva hlýtur friðarviðurkenninguna fyrir ævistarf sitt í þágu umhverfis og friðar í heiminum. Dr. Shiva er kunnur vísindamaður og einn af mestu afreksmönnum veraldar í umhverfismálum.

,,Það er einlæg ósk Yoko Ono að á afmælisdegi John Lennons muni íslenska þjóðin og heimurinn allur sameinast í bæn um frið og stöðugleika í þjóðfélaginu," segir í tilkynningu.

Kveikt verður á Friðarsúlunni í Viðey í kvöld klukkan 20. Friðarsúlan er hönnuð af Yoko Ono og reist í samvinnu við Reykjavíkurborg og Orkuveitu Reykjavíkur.

Yoko býður almenningi upp á ókeypis siglingar út í Viðey daganna 9. til 15. október. Hundrað og fimmtíu manna bátur mun leggja frá bryggju á Skarfabakka klukkan 20 alla dagana.

Ingimundur Sigurpálsson, forstjóri Íslandspósts, kynnti við athöfnina í dag útgáfu frímerkis með mynd af Friðarsúlu Yoko í Viðey. Andlitsmynd John Lennons er greipt inn í frímerkið.