Tíska á meðal unglingstúlkna í Bandaríkjunum að verða óléttar

Yfirvöld í Massachusetts í Bandaríkjunum rannsaka nú af hverju 17 unglingstúlkur í sama skólanum hafa allar orðið óléttar á sama tíma. Engin stúlknanna er eldri en 16 ára en að minnsta kosti helmingur þeirra virðist hafa gert samning sín á milli um að reyna að verða óléttar.

Samkvæmt fréttavef BBC stunda stúlkurnar allar nám í Gloucester framhaldskólanum í Massachusetts. Þetta er fjórum sinnum hærra hlutfall óléttra stúlkna í þeim skóla en árinu áður. Einnig hefur aldur feðranna verið rannsakaður en þeir eru taldir vera á þrítugsaldri. Gætu þeir því átt yfir höfði sér kæru fyrir að stunda kynlíf með börnum undir aldri þar sem ólöglegt er að stunda kynlíf í fylkinu fyrr en við sextán ára aldur.

Síðustu ár hefur verið aukning óléttra unglingsstúlkna í Bandaríkjunum en áður hafði hlutfall óléttra unglingsstúlkna farið lækkandi þar í landi. Telja sérfræðingar það mögulega stafa af vilja stúlkna til þess að verða fullorðnar sem fyrst.

Einnig hefur verið haldið fram að ólétta frægra ungstirna á borð við Jamie Spears og jákvæðni gagnvart óléttu í kvikmyndinni Juno hafi aukið tíðni óléttra unglingstúlkna. Sérfræðingar benda hins vegar á að aukningin hafi byrjað fyrr.