Þingmaður vill að Brown víki

Gordon Brown, forsætisráðherra Bretlands og leiðtogi Verkamannaflokksins, hefur mistekist og hann á að segja af sér, að mati Gordon Prantice þingmanns Verkamannaflokksins. Prentice er annar þingmaður flokksins sem opinberlega hefur farið fram á afsögn Browns.

Prentice er 57 ára gamall og hefur setið í neðrideild breska þingsins í 17 ár fyrir Pendlekjördæmi í norðurhluta landsins.

Tony Lloyd, þingflokksformaður Verkamannaflokksins, segir skoðun Prantice ekki endurspegla afstöðu þingmanna flokksins. Hann segir það vera útbreidda skoðun innan þingflokksins að Brown eigi óhikað að sitja sem fastast áfram.

Breskir fjölmiðlar héldu því fram um helgina að verið væri að skipuleggja atlögu gegn Brown. Síðan þá hafa ráðherrar og áhrifamenn innan flokksins hafa keppst við að lýsa yfir stuðningi við Brown og segja alrangt að verið sé að skipuleggja hallarbyltingu innan Verkamannaflokksins.

Staða Gordon Brown og Verkamannaflokksins hefur veikst mikið undanfarið ár. Flokkurinn missti borgarstjórastólinn í London og fjölmarga sveitarstjórnarmenn á landsvísu á 1. maí og tapaði áður öruggum sætum í Crewe, Nantwich, Henley í maí og júní.

Fyrir helgi varð Verkamannaflokkurinn fyrir enn einu áfallinu þegar hann tapaði er talið var öruggu þingsæti í aukakosningum í Glasgow East í Skotlandi heimavígi forsætisráðherrans.