Dalai Lama vill friðsamar viðræður um Tíbet

Dalai Lama, andlegur leiðtogi Tíbeta, neitar staðfastlega ásökunum kínverskra yfirvalda um að hann standi á bak við mótmæli sem geisað hafa í landinu. Hann segist ekki sækjast eftir aðskilnaði Tíbets frá Kína og að hann hafi enga löngun til þess að skemma umgjörð Ólympíuleikana sem fram fara í Beijing í sumar.

Leiðtoginn var á ferð um Nýju Delhi í dag þegar hann gaf út yfirlýsinguna og hvatti hann kínversk yfirvöld til þess að koma á friðsömum viðræðum við fólkið í Tíbet.

Yfirvöld í Kína hafa kennt Dalai Lama og fylgismönnum hans um ofbeldisölduna sem hefur risið að undanförnu í Tíbet en Kínverjar hafa verið gagnrýdir fyrir að taka hart á andófsmönnum í landinu.

George Bush Bandaríkjaforseti sagðis í dag hafa talað forseta Kína Hu Jintao fyrr í vikunni í síma þar sem hann hafi sagt honum að það væri Kínverjum fyrir bestu að koma á samræðuvettvangi við Tíbeta.