Veikum meðlim Mansonfjölskyldunnar neitað um náðun

Susan Atkins sem tilheyrði Mansonfjölskyldunni illræmdu var neitað um náðun í gær þriðjudag. Hin 60 ára Atkins er alvarlega veik og hefur verið greind með heilaæxli. Áður hafði henni verið neitað um reynslulausn 11 sinnum.

Atkins var ásamt fjórum öðrum sakfelld í október árið 1969 fyrir hrottaleg morð á fimm einstaklingum þar á meðal leikkonunni Sharon Tate. Engin önnur núlifandi kona hefur hefur setið jafn lengi af sér refsingu í Kaliforínu.

Mansonfjölskyldan réðst inn á heimili Tate og leikstjórans Romans Polanskis, sem var að heiman, í ágúst 1969. Þar réðst fjölskyldan meðal annars á Tate sem var komin átta mánuði á leið með frumburð sinn og Polanskis. Atkins hélt Tate niðri og stakk hana 16 sinnum. Kvöldið eftir myrti Mansonfjölskyldan auðugt par á heimili sínu í Los Angeles.

,,Hún bað mig um að hlífa barninu," mun Atkins hafa sagt þegar hún kom fyrir náðunarnefnd árið 1993 en segist hafa svarað á þá leið að hún hugðist ekki á neinn hátt hlífa Tate.

Þrátt fyrir hinn miklu veikindi Atkins segist Arnold Schwarzenegger, ríkisstjóri í Kaliforníu, vera sammála náðunar- og skilorðsnefndinni þar sem glæpirnir hafi verið afar ógeðfelldir.

Charles Manson, höfuð Mansonfjölskyldunnar, sem er 74 ára situr enn inn í fangelsi og á rétt á að koma fyrir náðunar- og skilorðsnefnd 2012. Hann hefur ítrekað reynt að fá reynslulausn.