Tímamótadómur að sögn sýslumanns

Ólafur Helgi Kjartansson, sýslumaður á Selfossi, segir að tímamótadómur hafi fallið í Héraðsdómi Suðurlands í dag. Dómurinn úrskurðaði að ökutæki manns sem dæmdur var fyrir ofsaakstur á Hellisheiði skyldi gert upptækt til ríkissjóðs.

Þetta er í fyrsta skipti sem reynir á lög sem tóku gildi í apríl. Þau gera upptöku ökutækja heimilia ef um stórfelldan eða ítrekaðan háska- og eða ölvunarakstur er að ræða.

Mennirnir sem hlut eiga að máli, munu báðir hafa gerst brotlegir við umferðarlög áður vegna hraðaksturs og hefur annar þeirra hlotið dóm vegna þess.

Ólafur Helgi, sem flutti málið sjálfur, segir hugsanlegt að málið fari fyrir hæstarétt. Héraðsdómur hafi hins vegar fallist á þetta nýja lagaákvæði ætti við um þann ofsaakstur sem átti sér stað á Hellisheiði í júní í fyrra og að það væri ánægjulegt. "Þetta er tímamótadómur," sagði Ólafur.